काठमाडौं । निर्वाचन आयोगले दिपक मनाङे निर्विरोध निर्वाचित भएको मनाङको प्रदेश सभा क्षेत्र नम्बर २ मा कात्तिक १७ गते नै उपचुनाव गर्ने भएको छ । ज्यान मार्ने उद्योगको मुद्दामा सर्वोच्च अदालतले दोषी ठहर गरेर जेल गएका मनाङे निर्वाचित भएको क्षेत्र रिक्त भएको छ ।
उनले अब ६ वर्षसम्म चुनाव लड्न पाउँदैनन् । २०७९ मा कांग्रेस र एमालेसहितको समर्थनमा निर्विरोध भएका मनाङे २०७४ मा एमालेको समर्थनमा स्वतन्त्र उम्मेदवार बनेर जितेका थिए । नेपालकै सबैभन्दा कम जनसंख्या र मतदाता भएको जिल्ला मनाङको प्रदेश सभा चुनाव जित्न एक हजार हाराहारी मत भए पुग्छ । मनाङको क्षेत्रमा निर्विरोध भए पनि १ नम्बर क्षेत्रमा कांग्रेसका मुनिन्द्र गुरुङले १२५५ मत ल्याएर प्रदेश सभा सदस्य जितेका थिए । एमालेका राजन गुरुङले ९२५ मत पाएका थिए । मनाङमा २०७९ को मतका आधारमा कांग्रेस र एमाले मुख्य प्रतिस्पर्धी हुन् । रास्वपाले तेस्रो मत पाएको थियो ।
समानुपातिक मत हेर्ने हो भने प्रदेश सभामा एमालेले २०८८ मत पाउँदा कांग्रेसले १६५० र माओवादीले ९०४ मत पाएको थियो । प्रदेश सभामा रास्वपाले भाग लिएको थिएन । प्रतिनिधि सभातर्फ भने कांग्रेसको २४३०, एमालेको २१९१, रास्वपाको १४६ र माओवादीको १३३ मत थियो । यो क्षेत्रमा प्रदेशसभा निर्वाचन भएदेखि नै मनाङेले मात्र प्रतिनिधित्व गरेका थिए ।
रास्वपाले प्रदेशसभाको चुनावमा भाग नलिएको अवस्थामा फेरि पनि यो ठाउँमा कांग्रेस र एमालेकै प्रतिस्पर्धा हुनेछ । यो प्रदेशसभा क्षेत्रमा नार्पाभूमि गाउँपालिका र मनाङ ङिस्याङ गाउँपालिका पर्छन् । मनाङ ङिस्याङमा एमालेले अध्यक्षसहित ४ वडाध्यक्ष जितेको छ ।
उपाध्यक्ष र २ वडाध्यक्ष पनि एमाले र स्वतन्त्र मिलेर जितेका छन् । त्यस्तै नार्पाभूमि गाउँपालिका अध्यक्ष कांग्रेसले जितेको छ भने उपाध्यक्ष एमालेले र वडाध्यक्ष स्वतन्त्रले जितेका छन् ।