काठमाडौं । प्रहरी वृत्त बालाजुका तत्कालीन डीएसपी रविन विष्ट र प्रहरी वृत्त सोह्रखुट्टेका डीएसपी गणेशबहादुर बम कारबाहीमा परेका छन् ।
फागुन १ गते काठमाडौंको बालाजुमा यातायात मजदुरको आन्दोलनका क्रममा भएको लुटपाटको घटनालाई लिएर प्रहरी प्रधान कार्यालयले उनीहरुलाई कारबाही गरेको हो ।
उनीहरुको कमजोर कमाण्डका कारण प्रहरीकै गाडीमा आगजनी, तोडफोड र मोबाइल पसल लुटपाट भएको प्रहरी प्रधान कार्यालयको ठहर रहेको छ ।
कारबाही स्वरुप डीएसपी विष्टलाई तीन वर्षसम्म बढुवा रोक्का गरिएको छ भने डीएसपी बमलाई भने नसियतको कारबाही गरिएको छ ।
घटनाको छानबिन गर्न डीआईजी मसाउद आलम खाँको नेतृत्वमा गठित समितिको सिफारिसका आधारमा विष्ट र बममाथि कारबाही गरिएको हो ।
बालाजु क्षेत्रमा घटना भएको भए पनि थप मद्दतका लागि सोह्रखुट्टेबाट तत्काल पुगेर कारबाही अघि बढाउनुपर्नेमा उक्त कार्यमा चुकेको भन्दै बमलाई नसियत दिइएको बताइएको छ । बमको एक वर्षसम्म बढुवा रोक्का भएको छ ।